存款創造

上星期五國務院提出加大"定向降準"力度, 消息帶動夜期一度抽高超過100點, 究竟"定向降準"係嘜東東黎呢?

"定向降準"的意思其實係中央對一些符合結構調整和滿足市場需求的實體經濟貸款達到一定比例(即符合要求)的銀行適當降低存款準備金率, 相信講到哩度大家都已經明白夜期點解會升咁多了, 因為一聽到"減存款準備金率"就知道係好野黎~ 但至於點解係好野? 有幾好呢? 同大家深入銀行系統去了解一下啦

銀行貴為百業之母, 基本上每個行業甚至乎每個人都需要用到, 雖然現時銀行提供的服務常非多元化, 但追溯返最原點, 銀行既業務其實就係用一個較低既利率(eg. 3%)吸引大眾去存款, 之後再將聚集返黎既錢用較高既利率(eg. 5%)借返出去, 從而賺取息差(eg. 2%)

但由於存款並非銀行的資產(其實係存款者暫時放喺銀行度既資產, 即銀行欠存款者的負債), 當我地去提款時, 銀行係有絕對義務而需無條件地即時歸還的, 因此如果銀行將所有既存款借出, 將有機會導至客戶提款時冇錢俾, 咁就會出現擠提, 其連鎖反應甚至可能會動搖整個經濟體系! 所以有關的監管機構就會制定一個比率, 規定銀行必須最少留返幾多比率的存款作為儲備, 而哩個比率就係大家耳熟能詳既"存款準備金率 Reserve Requirement Ratio"

例如工行的存款總額為10000, 存款準備金率為20%, 即工行的法定儲備為2000, 最多只可以借8000出街. 減存款準備金率對內銀黎講當然係好事黎, 可以第一時間受惠, 因為可貸出既錢多咗, 息差總額就自然可以賺多d(假設利率不變及借貸需求充足), 內銀股升唔難理解. 但哩d都只係表面, "存款創造"先係對實體經濟帶黎最大威力既影響

用返之前個例子, 陳太存咗10000入工行 --> 工行將最高貸款額8000借咗俾李生 --> 李生就用借返黎既8000同黃生買電視 --> 黃生之後將嗰8000存返入建行 --> 之後建行又將最高貸款額6400借咗俾張生 --> 張生就用借返黎既6400同河生買電腦 --> 之後河生又將嗰6400存返入中行...... 如此類推, 藉著哩個過程不斷地重複重複又重複, 整個經濟體系就會因此而創造出大量既存款及大量貸款

根據以上例子的資料計算, 整個銀行體系的最高可創造存款等如: 40000 (10000 x (1/0.2)); 而最高可創造貸款就等如: 32000 ((10000 - 2000) x (1/0.2)), 比原本足足多咗四倍咁多! 當然, 以上例子係假設咗"銀行冇持有超額儲備", "冇資金流出存款創做過程"及"借貸需求充足"的情況, 去作出一個最極端化的例子, 實際情況當然唔會做到最大化既效果, 但經已show到"存款創造"的威力係幾何級數上的

雖然今次國務院提出加大"定向降準"力度只係針對"三農"及"小微企業", 這當然唔及正式減R.R.R. 0.5%咁有威力, 但點睇都係好野黎, 而最大正面的其實係顯示到中央保GDP 7.5%既決心, 這將對市場的信心打下一支強心針

但好可惜... 哩d都只係正路既睇法黎, 市場真正點睇唔係由我去解讀的... 明顯地大戶經已一早收到風會有政策出台而預先掃高內銀, 所謂"Buy the rumor, sell the fact", 加上黎梗12號工行除息, 19號中行, 02/07建行, 依家就個個沖入去搶貨收息, 黎梗係咪真係咁好市呢, 我就好有保留...

會唔會真係挑23400呢? 哩個星期好關鍵, 拭目以待~